Shqipëria U21 kishte një ndeshje të lehtë në letër ditën e djeshme në Elbasan teksa priste moshatarët e Andorrës. Mirëpo, gjithçka nisi ters për kuqezinjtë duke qenë se iu akordua një penallti kundër kur ende nuk ishte mbushur një minutë lojë. Miqtë e shfrytëzuan në maksimum dhe kaluan në avantazh.
Shqipëria kërkoi menjëherë të reagonte, por u përballën me një mur nga Andorra që ishte e gjitha në mbrojtje. Ndaj, pjesa e parë u mbyll me avantazhin e miqve, ndërsa në të dytën kuqezinjtë rritën edhe më shumë agresivitetin derisa gjetën golin me Adolf Selmanin që me kokë baraspeshoi rezultatin. Shpresat nuk hoqën dorë dhe në vazhdim gjetën edhe golin e dytë. Ismajlgeci harkoi në zonë aty ku Vrioni i aktivizuar në pjesën e dytë, shënoi për t’i dhënë avantazhin të tijve.
Në fund, pati vend edhe për golin e Bullarit, edhe ky i ardhur nga stoli, që përfitoi nga një top i kthyer pas goditjes së Kallakut. Ky ishte suksesi i dytë radhazi për të besuarit e trajnerit Bushi pas fitores në Austri. Në këtë formë, atmosfera në dhomat e zhveshjes ishte elektrizuese dhe kuqezinjtë festuan për këto suksese, ndërsa kjo ndaj Andorrës mund të konsiderohet fare mirë si një fitore karakteri duke qenë se ndeshja u vështirësua së tepërmi dhe këmbëngulja për të marrë rezultatin ishte vendimtare