Reforma administrativo-territoriale u bë objekt përplasjeje në seancën plenare të Kuvendit, ku kryetari i Partisë Demokratike, Sali Berisha, akuzoi mazhorancën se synon të shkurtojë edhe 20 bashki të tjera.
Nga foltorja e Kuvendit, Berisha deklaroi se projekti i diskutuar nga mazhoranca parashikon reduktimin e njësive vendore në të gjithë vendin.
Pretendimeve të tij iu përgjigj kreu i grupit parlamentar të Partisë Socialiste, Taulant Balla, i cili e akuzoi Berishën për dezinformim dhe tha se procesi për reformën nuk ka përfunduar.
“Kemi vlerësuar punën, nuk pati kërkesë të dakordësuar për zgjatje afatesh dhe personi që sapo gënjeu duhet ta dijë që në komisionin tjetër të zgjedhores Bylykbashi dhe Gjiknuri sollën kërkesën, ndërsa ky komision nuk solli kërkesë. Procesi fillon me raportin, më pas përfshihet Komisioni i Çështjeve Ligjore dhe pasi të kenë kaluar 60 ditë, në shtator do të kemi kohë ta diskutojmë. Qetësohuni dhe vazhdoni pushimet, flasim prapë në shtator”, u shpreh Balla.
Nga ana e tij, Berisha këmbënguli se opozita kishte kërkuar zgjatjen e afatit të komisionit dhe marrjen e ekspertizës së Kongresit të Autoriteteve Lokale dhe Rajonale të Këshillit të Europës.
“E vërteta është krejt tjetër. Boçi ka bërë përpjekjet më maksimale, direkt me Maznikun apo pengun, por edhe me përfaqësues të tjerë që janë angazhuar të mbështesin këtë proces. Pati një ujdi mes tyre për të zgjatur afatin e komisionit, ndërsa kushti për të marrë ekspertizën e Kongresit të Autoriteteve të Këshillit të Europës është i panegociueshëm për ne. Ishte Rama ai që urdhëroi pengun e tij të veprojë në mënyrë të njëanshme. Projekti i diskutuar nga ju shkurton edhe 20 bashki të tjera të shpërndara në të gjithë vendin”, deklaroi Berisha.