Demonstratat antiqeveritare të cilat shpërthyen gjashtë javë më parë në Iran për shkak të vdekjes së të resë Mahsa Amini janë përshkallëzuar. Pamjet e postuara në rrjetet sociale tregojnë qindra njerëz të cilët marshojnë në një rrugë kryesore duke brohoritur me thirrjet “Vdekje diktatorit”, një referencë për liderin suprem të Iranit.
Protestat janë ringjallur edhe në qytete të tjera, si Andimeshk Borujerd dhe Lahijan. Ky përshkallëzim i protestave vjen një dite pasi policia raportohet se ka hapur zjarr ndaj protestuesve në Saqqez, qytetin e lindjes së 22-vjeçares Mahsa Amini, e cila ndërroi jetë në paraburgim pasi u arrestua se kishte shkelur rregullat e mbajtjes së shamisë së kokës.
Një grup i të drejtave të njeriut dhe dëshmitarë thanë se oficerët e policisë përdorën gaz lotsjellës për të shpërndarë turmat dhe kanë qëlluar me armë. Sipas grupeve të të drejtave të njeriut të paktën 234 protestues, përfshirë 29 fëmijë, janë vrarë nga forcat e sigurisë deri më tani.