Banorët e fshatrave Muzhakë, Midhë, Frankth, Batër e Madhe e Batër e Vogël në njësinë administrative Komsi kundërshtojnë ndërtimin e gurores mbi fshatin Selixë, rrëzë malit të Qafë Shtamës. Ata pretendojnë se nuk është marrë mendimi i tyre dhe se ndërtimi i saj do të kishte ndikim negativ në mjedis, cilësinë e ujit të pijshëm dhe ndotjen e ajrit.
Kryetarët e këtyre fshatrave, Asllan Bardhi, Hazis Ruci, Shaqir Sula, Sabri Hani e Adem Kurti, si dhe banorë të kësaj zone, u takuan sot me Prefektin e Qarkut të Dibrës, Nexhbedin Shehu. Ata u shprehën se vite më parë ish këshilli komunal nuk ka dhënë pëlqimin e tij për ndërtimin e gurores në këtë zonë të bukur turistike.
“Ndërtimi i gurores dhe furrave të gëlqeres nga subjekti “Babasi Co” dëmton të gjitha resurset që ka kjo zonë, si zonë turistike, si dhe burimet e ujit të pijshëm. Këshilli i Komunës Komsi në vitin 2015 nuk e ka pranuar kërkesën e subjektit privat për “shfrytëzim gurë gëlqerorë në zonën nr.272/1 në objektin Qafë Shtamë”, u shpreh në takimin me Prefektin e Dibrës, kryetari i fshatit Frankth, Asllan Bardhi.
Prefekti nga ana e tij saktësoi se ka vënë në lëvizje strukturat që ai drejton për të sqaruar shqetësimin e banorëve të Komsisë. “Në dijeninë time, nënvizoi Shehu, banorët e fshatit Selixë kanë marrë pjesë në dëgjesën e organizuar dhe ata kanë rënë dakort për ndërtimin e një punishtje mermeri në Qafë Shtamë. Ne do të bëjmë të pamundurën për të sqaruar situatën që ju paraqisni”.
Kryeplaku i fshatit Selixë Luan Dishani, i cili nuk është pjesë e peticionit të pesë fshatrave të tjerë saktësoi se ai nuk e ka hedhur vulën në dokumentacionin e firmës që ka aplikuar për ndërtimin e një kantieri për nxjerrjen e mermerit. Dishani tha se: “10 kryefamiljarë të fshatit Selixë kanë firmosur për ndërtimin e katierit të mermerit. Edhe unë kam firmosur si banorë i fshatit, por nuk e kam hedhur vulën. As uji dhe as mjedisi nuk dëmtohen nga ndërtimi i këtij objekti. Ne nuk do të lejojmë ndërtimin e ndonjë gurorje apo furrave të gëlqeres, ndërkohë nxjerrja e mermerit nuk krijon probleme, përkundrazi hapen vende të reja pune”.
