Katër persona janë arrestuar për grabitjen e orës së pilotit të Ferrarit, Charles Leclerc. Grabitje e kryer në Viareggio të Italisë më 18 prill 2022.
Ora, një Richard Mille RM 67 -02 që kap vlerën e mbi dy milionë eurove, më pas u rishit në Spanjë.
Sipas hetuesve, katër personat e arrestuar e kishin ideuar dhe kryer grabitjen. Bëhet fjalë për tre burra dhe një grua.
Autoritetet kanë arritur t’i gjurmojnë pasi kanë dëgjuar shumë dëshmitarë dhe kanë analizuar pamjet nga kamerat e vëzhgimit në zonë.
Ora e Charles Leclerc dyshohet se i është shitur menjëherë nga banda një sipërmarrësi spanjoll, por për shkak të bujës që mori ngjarja dhe si rrjedhojë vështirësisë në rishitjen e saj, të katërt nuk do të kishin arritur të mblidhnin më shumë se 200 mijë euro, ndërsa vlera e saj është padyshim shumë më e lartë.