Një punonjës i Gardës së Republikës është arrestuar nga kolegët e tij të SHÇBA-së pasi ka plagosur me armë një 22-vjeçar.
Ngjarja ka ndodhur mbrëmjen e të hënës në rrugën “Ramadan Çitaku” në Tiranë, kur Florian Hysa, trup shërbimi në Gardë ka plagosur Lorenc Doçin. Ky i fundit është dërguar në spitalin e Traumës në kujdesin e mjekëve.
Ngjarja mësohet të ketë ndodhur për motive të dobëta, ndërsa Shërbimi për Çështjet e Brendshme dhe Ankesat ka bërë menjëherë arrestimin e tij.
NJOFTIMI I MINISTRISE SE BRENDSHME
Shërbimi për Çështjet e Brendshme dhe Ankesat (SHÇBA) në bashkëpunim me specialistët e Sektorit të Krimeve ndaj Jetës në D.V.P Tiranë arrestuan në flagrancë shtetasin F.H., me detyrë punonjës i Gardës së Republikës, trup shërbimi.
Arrestimi i 22-vjeçarit u krye pasi në rrugën “Ramadan Çitaku” në kryqëzim me rrugën e “Balshajve”, ai dyshohet se ka plagosur për motive të dobëta me armën e shërbimit shtetasin L.D., 22 vjeç banues në Kodër Kamëz, i cili është dërguar në SUT për trajtim mjekësor.
Materialet në ngarkim të tij do t’i kalohen Prokurorisë së Rrethit Gjyqësore Tiranë, për hetime të mëtejshme në ngarkim të shtetasit F.H., për veprën penale, “Vrasja me dashje, e mbetur në tentativë”.