Në mediat e Bjellorusisë ka qarkulluar sot një video ku shfaqet gazetari i arrestuar bjellorus, Raman Protasevich, i cili në të thotë se po bashkëpunon me autoritetet.
Protasevich deklaron në video se ai madje po bashkëpunon edhe me hetuesit e kontrolluar nga presidenti Lukashenko.
“Unë vazhdoj të bashkëpunoj me hetuesit dhe po merrem në pyetje në lidhje me organizimin e protestave masive në qytetin e Minsk”, tha ai.
Më herët sot u përhap lajmi se gazetari ishte shtruar në spital. Autoritetet e Minskut hodhën poshtë këto informacione që i quajtën “thashetheme” në mediat sociale dhe thanë se nuk kishin asnjë informacion në lidhje me ndonjë problem shëndetësor të gazetarit.
Për këtë flet edhe gazetari në videomesazhin që nuk dihet në ç’kushte është dhënë: “Mund të them se nuk kam probleme shëndetësore”.
Pratasevich ka qenë administrator i kanalit NEXTA Live në Telegram, platformë që ka mbuluar protestat që kanë shpërthyer në Bjellorusi prej mbajtjes së zgjedhjeve.
Autoritetet bjelloruse kanë nisur hetimet ndaj Pratasevich dhe kolegut të tij Stsyapan Putsila, në muajin nëntor, nën dyshimet për organizim të çrregullimit masiv, prishjes së rendit shoqëror dhe nxitjes së urrejtjes.
Në tetor të vitit të kaluar, një gjykatë në Minsk e ka shpallur kanalin NEXTA dhe logon e tij si ekstremiste.