Gjatë konferencës së tij për mediat kryeministri Edi Rama ka reaguar lidhur dhe me kallëzimin e policëve ndaj kryebashkiakut të Lezhës Pjerin Ndreu.
“Kur vjen puna për ofendimin e policisë, askush nuk ka të drejtë dhe nuk mund tia hedhë lehtë pa u përballur me ligjin, ofendimi i policisë. Por, policisë i bëhet dhe një ofendim tjetër i vazhdueshëm, i përditshëm kur i hidhet faji për çdo gjë që ndodh. Ky është një ofendim shumë më i madh se sa ofendimi individual i një personi, sepse ai zgjidhet, është aty, i drejt për drejtë, është në shkelje të etikës dhe ka proces. Unë do shqetësohesha nëse policia apo strukturat përkatëse nuk do kishin ndjekur rrugën ligjore. Të gjithë mund të gabojnë dhe të gjithë të përgjigjen për gabimet e tyre. Rëndësi ka që në këtë rast nuk kemi tolerim të faktit që një zyrtar i lartë ofendon një patrullë apo një punonjës policie”, tha Rama.
Kryetari i Bashkisë së Lezhës, Pjerin Ndreu, është kallëzuar penalisht në Prokurori, nga tre efektivë të Policisë së Shtetit, me pretendimin se i ka penguar të ushtrojnë detyrën.
Sipas burimeve nga organi i akuzës, ngjarja ka ndodhur mbrëmjen e së enjtes në zonën turistike të Shëngjinit, jashtë ambienteve të një hoteli në vijën e parë të bregdetit. Punonjësit e Policisë kanë kërkuar ndërprerjen e muzikës dhe mbylljen e lokalit, por kanë hasur në kundërshtinë e pronarit të subjektit.
Përballë rezistencës, në ndihmë të patrullës së Shëngjinit ka shkuar forca e posaçme “Shqiponja”, të cilët në debat e sipër kanë tentuar të shoqërojnë në Komisariat pronarin e hotelit, por referuar kallëzimit penal, në ato momente ka dalë nga lokali kryebashkiaku i Lezhës, Pjerin Ndreu, duke i penguar të ushtrojnë detyrën, me pretendimin se ligjin e bënte ai.
Një ditë më pas, ndaj dy efektivëve të patrullës së Shëngjinit ka nisur hetim disiplinor nga eprorët e tyre për “Shkelje të rëndë të atributeve e kompetencave të Policisë”, me argumentin se në subjektin ku kishte muzikë në shkelje të ligjit, po zhvillohej një aktivitet i Bashkisë Lezhë, ku ishin të pranishëm edhe përfaqësues të huaj.