Punonjësit e Drejtorisë Vendore të Policisë së Tiranës kanë dhuruar gjak për t’u ardhur në ndihmë personave të aksidentuar, me dializë apo pacientëve me talasemi. Përmes një reagimi në rrjetet sociale, Policia e Tiranës njofton se mjaftojnë 10 minuta për të shpëtuar tre jetë.
“Strukturat e DVP Tiranë dhurojnë gjak në kuadër të fushatës kombëtare, për dhurimin vullnetar të gjakut, në ndihmë të pacientëve me talasemi, të sëmurëve kronikë, hemofilikë, atyre me dializë, si dhe personave të aksidentuar. Në shenjë solidariteti dhe përgjegjshmërinë ndaj misionit fisnik që kanë, punonjës të Drejtorisë Vendore të Policisë së Tiranë, iu përgjigjën pozitivisht thirrjes së Qendrës Kombëtare të Transfuzionit të Gjakut, për dhurim gjaku”, njofton Policia e Tiranës.
“Punonjës të strukturave të ndryshme të DVP Tiranë, paraditen e sotme dhuruan gjak, duke dëshmuar se Policia është dhe mbetet përherë pranë komunitetit dhe në shërbim e ndihmë të tij, pasi humanizmi dhe sakrifica janë në thelb të misionit të Policisë së Shtetit. Dhurimi i gjakut, do të vijojë dhe në ditët në vijim, në komisariatet në varësi të DVP Tiranë”, përfundon njoftimi i Policisë së Tiranës.