Një i ri shqiptar, i arrestuar disa muaj më parë nga policia në Coventry të Britanisë së Madhe pasi autoritetet i kapën një sasi droge dhe parash cash në shtëpinë e tij, do të duhet të dorëzojë edhe një tjetër shumë parash, ndryshe do të përballet edhe me 10 muaj burgu të tjera.
26-vjeçari shqiptar Leonard Coga u arrestua pasi policia i gjeti thasë me kanabis në shtëpi si edhe një sasi parash, të cilat sipas tij i përkisnin një grupi kriminal shqiptar në zonë, të cilët i kishin lënë aty për ruajtje dhe do t’i merrnin kur t’u duheshin. Për këtë, ai do të paguhej 160 mijë paund sipas deklaratës në polici.
Në lidhje me drogën, ai u dënua me 27 muaj burg, por kur prokuroria urdhëroi kryerjen e një hetimi financiar mbi pasurinë e tij, u zbulua se ai në fakt kishte deklaruar 38.600 paund, kurse pjesa tjetër nuk u gjet.
Sipas prokurores Olivia Beesley atij nuk iu gjet diferenca e parave që tha se do të përfitonte për ruajtjen e kanabisit, prandaj tani do të duhej t’i dorëzonte ato ose duhet të përballet edhe me 10 muaj burg të tjera.
Shqiptari ka 28 ditë kohë sipas autoriteteve që të dorëzojë këto para.
Avokati i Cogas tha se ai nuk kishte dënime të mëparshme, por kishte pësuar një lëndim të rëndë në dorë, nga ku filluan problemet e tij financiare.
“Ai mbështetej nga gruaja e tij, por më pas ajo nuk mund të punonte më për shkak të koronavirusit dhe u vu në shënjestër të grupeve kriminale që të ruante kanabisin e tyre në shtëpi”, u shpreh avokati.
“Ata nuk i kishin thënë deri sa mbërritën se çfarë do të ruante, megjithëse ai e dinte se do të ishte diçka e paligjshme. Individëve iu dha një çelës dhe ata i dërgonin mesazh kur donin të shkonin dhe ai lironte ambientet. Ai nuk ishte dikush që po luante një rol kryesor në këtë grup kriminal”, vijoi avokati.
Duke e burgosur Coga-n, gjykatësi Andreë Lockhart i tha: “Ti kishe në shtëpinë tënde 29.5 kilogramë kanabis. Kjo është një sasi e madhe. U gjetën gjithashtu edhe një sasi e madhe parash. Duket qartë se ti ke patur një rol të rendësishëm pasi e ke kthyer shtëpinë në bazë të furnizimit me drogë”.