Në konferencën e shtypit që shënon 19-vjetorin e anëtarësimit të Polonisë në Bashkimin Evropian, Presidenti Morawiecki dhe kryeministri Duda përmendën si prioritet zgjerimin e shpejtë të Unionit me Ballkanin Perëndimor dhe Ukrainën.
“Ne jemi përkrahës të politikës së dyerve të hapura të BE-së, sidomos me vendet e Ballkanit Perëndimor. Dua të theksoj, këto janë vende, janë popuj, janë shoqëri që presin prej vitesh të bëhen pjesë e komunitetit europian. Më në fund ky objektiv duhet që të arrihet. Polonia e di shumë mirë se si është që të presësh vite për të hyrë në botën e lirë perëndimore”, u shpreh Presidenti Morawiecki.
“Në territorin e shteteve të Ballkanit Perëndimor tashmë po ndërhyjnë edhe aktorë të tjerë si Kina, Turqia, Rusia, bota e Islamit. Vetëm zgjerimi i Bashkimit Evropian në hapësirën e Ballkanit Perëndimor do të na lejojë që t’i përgjigjemi siç duhet sfidave që lidhen edhe me emigracionin e paligjshëm. Polonia duhet të flasë fuqishëm dhe me zë të lartë: ata duhet të pranohen në Bashkimin Evropian, vendet e Ballkanit Perëndimor duhet të pranohen. Sot kjo është kërkesa jonë historike, kërkesa absolute e momentit është pranimi i shpejtë në BE i shteteve të Ballkanit Perëndimor, Ukrainës dhe Moldavi”, tha kryeministri Andrzej Duda.