Në mes të trazirave, Presidenti i Sri Lankës, Gotabaya Rajapaksa është larguar nga vendi mëngjesin e kësaj të mërkure me një avion ushtarak, pasi populli dje ishte në aeroport dhe Rajapaksa kishte frikë të shkonte atje.
Vendimi ka ardhur pas protestave masive popullore mbi krizën ekonomike, që e detyruan atë të japë dorëheqjen. 73 vjeçari ka mbërritur në Maldive me bashkëshorten e tij dhe dy zyrtare të lartë të sigurisë.
Protestat për mbi 1 muaj i dhanë fund dinastisë së familjes presidenciale, që drejtoi Sri Lankën për dekada të tëra. Sipas mediave, Raxhapaksa nuk do të qëndrojë në Maldive dhe synon të largohet përfundimisht drejt një vendi të tretë.