I dërguari i posaçëm i Shteteve të Bashkuara për Ballkanin Perëndimor, Escobar kërkon që Kosova dhe Serbia të nisin me zbatimin e marrëveshjes për normalizimin e marrëdhënieve. Paçka se firmë nuk pati në Ohër, ai nënvizoi se “pajtimi i arritur më 18 mars është marrëveshje në të gjitha aspektet dhe është ligjërisht e detyrueshme për palët”.
“Rruga europiane e tyre është jashtëzakonisht e kushtëzuar me zbatimin e kësaj marrëveshjeje”, tha Escobar gjatë një audiokonference. Një porosi të veçantë pati për kryeministrin e Kosovës, Albin Kurti, duke nënvizuar se është e rëndësishme që të nisë me përpilimin e versionit të tij për themelimin e Asociacionit të Komunave me shumicë serbe.
“Kjo marrëveshje është nisja e pajtimit mes Kosovës dhe Serbisë. Ka shumë punë që duhet të bëhet përtej kësaj marrëveshjeje”, u shpreh zyrtari i SHBA.