Mbrëmjen e së shtunës Porto Palermo Festival ul siparin me një koncert në pedonalen e Himarës. Emrat më të njohur të skenës së muzikës, por jo vetëm, do të performojnë për publikun.
Një ftesë e veçantë për këtë aktivitet erdhi edhe nga kryeministri Rama, i cili fton artdashësit të mos e humbin këtë mbrëmje. Ai e shoqëroi mesazhin e tij me disa video nga netët e Porto Palermo Festival.
Mbrëmja e 17 gushtit shënoi finalen e madhe të edicionit të pestë të këtij festivali që u zhvillua në oborrin e Kalasë së Ali Pashës.
Një natë e elektrizuar nga dritat dhe ritmet moderne, ku historia u ndërthur me artin bashkëkohor, solli një përjetim të paharrueshëm për publikun.
Publiku vallëzoi deri në agim, duke përjetuar një natë plot energji dhe emocione.
Mbrëmja e 12-të kulmoi me një edicion të mbushur me art, kulturë dhe muzikë nga e gjithë bota.
Porto Palermo Festival, i organizuar për të pestin vit radhazi nga violinisti Olen Çesari, është tashmë një traditë e verës shqiptare që sjell artistë vendas dhe ndërkombëtarë në një dialog kulturor pa kufij. Ai i cilësoi 12 netët e këtij festivali si 12 xhevahire, duke e vlerësuar si tepër të suksesshëm këtë aktivitet.