Kush ka ndjekur sportin e bukur të futbollit, me siguri ka dëgjuar për Mjeshtrin e Sportit, Qytetarin e Nderit, Dali Farruku.
Për tifozët matjanë, ai konsiderohet legjendë, paçka se luajti futboll edhe para viteve ’90 dhe nga regjimi i kohës nuk mori aq sa dha.
Florenc Farruku është pasaardhës i një dere që po e lartëson dinastinë Farruku.
E ka nisur këtë sport që në moshën 7-vjeçare. Edhe pse në moshë të re ka luajtur 33 ndeshje zyrtare me bluzën verdhë e blu të skuadrës së vendlindjes. Këtë sezon ai ka shënuar 4 gola, duke “vulosur” rezultatin për skuadrën e Burrelit.
“Aktualisht kemi një skuadër solide, të fortë, serioze. Unë dhe kolegët e mi kemi krijuar raste të shumta shënimi, paçka se nuk jemi aty ku dëshirojmë ne dhe drejtuesit e bashkisë e të klubit”, shprehet Farruku i “vogël”.
Ai është optimist se objektivi që kërkojnë vendorët do të realizohet dhe Burreli do të jetë në fund të sezonit 2021-2022 një nga tri ekipet më të mira të Kategorisë së Parë.
Duke përfunduar, Florenci thotë se po ecën në gjurmët e Dali, Xhelal, Kastriot, Alvaro, Kleando dhe Ylber Farrukut dhe do të bëjë të pamundurën që ky mbiemër të gëzojë mbështetjen e tifozëve matjanë.
