Këshilli i Ministrave pritet të miratojë sot projektbuxhetin për vitin 2024. Ministri i Financave dhe Ekonomisë, Ervin Mete, bëri të ditur projektbuxheti 2024 do të vijojë mbështetjen për reformën e pagave, në arsim, shëndetësi, forcat e rendit, të mbrojtjes dhe në sektorë të tjerë.
Po ashtu ai theksoi se fondi për investimet publike parashikohet mbi 5 % e PBB-së. “Sot, në një mbledhje të posaçme të Këshillit të Ministrave, do të miratojmë projektbuxhetin 2024, i cili vijon mbështetjen për reformën e pagave, në arsim, shëndetësi, forcat e rendit, të mbrojtjes dhe në sektorë të tjerë. Gjithashtu, projektbuxheti i vitit të ardhshëm mban në nivelin mbi 5% të PBB-së financimin e investimeve publike, jep mbështetje për zhvillimin e turizmit, si edhe vijon mbështetjen për fermerët dhe shtresat në nevojë”, deklaroi ministri Mete.
Kreu i financave publike vuri në dukje se edhe përgjatë vitit 2024 MFE mbetet e angazhuar për të vijuar me konsolidimin fiskal, me synim uljen e mëtejshme të borxhit publik, duke respektuar një balancë primare pozitive, të përcaktuar edhe në ligj. Nga ana tjetër, Mete bëri të ditur se po punohet për hartimin e një strategjie të re afatmesme të mbledhjes së të ardhurave me FMN-në.