Prioritetet e vitit 2022 ishin kryefjala e takimit të Organit Këshillues pranë Prefektit të Qarkut Dibër Nexhbedin Shehu me katër kryetarët e bashkive të këtij rajoni Agron Malaj, Ilmi Hoxha, Lefter Alla, Shkëlqim Murrja dhe drejtorët rajonal të institucioneve.
Prefekti nënvizoi se kjo traditë është ndjekur prej vitesh dhe ka për qëllim t’i përcjellë qeverisë prioritetet për çdo bashki. Shehu theksoi se rrugët, mjedisi, bujqësia, arsimi, shëndetësia si dhe sektorë të tjerë do të jenë me siguri në krye të prioriteteve të organeve të qeverisjes vendore.
Kryetari i Bashkisë Mat Agron Malaj tha se gjatë vitit të kaluar ka nisur investimi për ujësjellësin e Zallë Gjoçajve që do t’u shërbejë mbi 25 mijë banorëve të 17 fshatrave dhe atyre të Burrelit.
“Ndërtimi i banesave sociale, shkolla profesionale, kanalet ujitëse, mirëmbajtja e rrugëve rurale, pastrimi i territorit, rikonstruksioni i çerdheve, kopshteve, shkollave, qendrave shëndetësore, mjediseve sportive, etj kanë patur vëmendjen e shtuar të Bashkisë Mat”, tha Malaj.
Ai përmendi si prioritete të vitit 2022 rritjen e sipërfaqes që do të ujitet, vazhdimin e investimeve për banesat sociale, rehabilitimin e QKF-së Burrel, asfaltimin e rrugëve të fshatrave Gërman e Batër e Vogël, investimin në vendgrumbullimin e mbetjeve urbane Burrel, rikonstruksionin e unazës poshtë qytetit Burrel, rehabilitimi i shkollës “Pjetër Budi” dhe “Ali Metra”, përmirësimin e infrastrukturës në të gjitha lagjet e Burrelit me fondet e bashkisë dhe specialistët e ndërmarrjes bashkiake.
