Në Prefekturën e Qarkut Dibër u zhvillua një takim pune mbi prioritetet zhvillimore për vitin 2026, me pjesëmarrjen e kryetarëve të bashkive dhe drejtuesve të institucioneve rajonale, nën drejtimin e Prefektit z. Nexhbedin Shehu.
Gjatë takimit u theksua se zhvillimi ekonomik, përmirësimi i infrastrukturës dhe mbështetja e sektorëve strategjikë mbeten objektivat kryesore për rajonin. Vëmendje e veçantë iu kushtua funksionalizimit të infrastrukturës rrugore, sidomos lidhjes së zonave rurale me qendrat urbane, si një faktor kyç për rritjen ekonomike.
Bujqësia, agropërpunimi dhe turizmi u vlerësuan si sektorë me potencial të lartë zhvillimi. Mbështetja e fermerëve, modernizimi i teknologjisë bujqësore dhe promovimi i turizmit malor e natyror pritet të kontribuojnë në rritjen e punësimit dhe të ardhurave.
Gjithashtu, u nënvizua rëndësia e përmirësimit të shërbimeve publike në arsim dhe shëndetësi, me synim rritjen e cilësisë së jetës. Përfaqësuesit lokalë theksuan se arritja e këtyre objektivave kërkon bashkëpunim të ngushtë ndërinstitucional dhe përdorim efikas të fondeve publike dhe mbështetjes nga donatorët.
Rajoni i Dibrës mbetet i angazhuar për një zhvillim të qëndrueshëm, të bazuar në burimet lokale dhe nevojat e komunitetit.