Presidenca franceze gjashtëmujore e Këshillit Europian përfundon zyrtarisht sot, por pa iniciativa të reja për heqjen e vetos bullgare për integrimin evropian të Maqedonisë së Veriut dhe rrjedhimisht edhe Shqipërisë.
Qeveria në Shkup pretendon se ende nuk ka marrë një propozim zyrtar nga Parisi për zgjidhjen e mosmarrëveshjes me Bullgarinë e po kështu në Sofje ka pasur një periudhë heshtjeje që prej votimit të propozimit francez dhe rrëzimit të qeverisë së Kirill Petkovit.
Javën e kaluar, kryeministri maqedonas e refuzoi propozimin francez, duke e quajtur si shkelës së vijave të kuqe të Shkupit, sa i përket mbrojtjes së gjuhës maqedonase, identitetit, Kushtetutës dhe historisë.
Qeveria e Dimitar Kovaçevskit gjithashtu insiston se negociatat me Bashkimin Evropian duhet të nisin përpara se të bëhen ndryshimet kushtetuese, përmes të cilave do të bëheshin pjesë e preambulës së saj edhe bullgarët, malazezët dhe kroatët.
Socialdemokrati po ashtu kërkon që Sofja dhe BE-ja t’i japin fund me kërkesat e mëtejshme ndaj Shkupit. Nga 1 korriku, presidenca e Këshillit Evropian do të merret nga Republika Çeke dhe nëse nuk ka përparim deri në mesnatën e 30 qershorit, mosmarrëveshjet Shkup-Sofje do t’i kalohen Pragës zyrtare.