Presidenti i Këshillit Europian, Charles Michel, u prit sot me një ceremoni zyrtare nga kryeministri Edi Rama, në Pallatin e Brigadave në Tiranë.
Pas ekzekutimit të himnit të Bashkimit Europian dhe Himnit të Shqipërisë, Michel dhe Rama parakaluan para Gardës së Republikës së Shqipërisë.
Michel dhe Rama po zhvillojnë një takim, ndërsa më pas do të dalin në një konferencë të përbashkët për shtyp.
Kryeministri Edi Rama deklaroi sot se në qendër të bisedës me Michel do të jetë Konferenca e Donatorëve në 17 shkurt, për tërmetin e 26 nëntorit.
Presidenti i KE-së Michel viziton Shqipërinë një javë pas Komisionarit për Zgjerim, Oliver Varhelyi, i cili zhvilloi takime me krerët më të lartë të politikës në vend, si dhe vizitoi zonat e prekura nga tërmeti.
Konferenca e Donatorëve që do të mbahet më 17 shkurt në Bruksel, do të japë mbështetje për Shqipërinë pas tërmetit të 26 nëntorit.