Presidenti i Ligës Profesioniste, Edvin Libohova ka folur në lidhje me incidentin që ndodhi së fundmi në stadiumin e Kamzës, ku tifozët dhunuar arbitrin Eldorian Hamiti. Ai ka pranuar se duhet rikthimi i policisë në stadium, ose në të kundër duhet të mendohet seriozisht ndërprerja e kampionatit.
“Duhet të jemi të qartë që Liga nuk ka filluar akoma funksion. Përgjegjësinë e ka Federata dhe po flas në emër të Federatës. Ajo që ka ndodhur sot është shumë e rëndë dhe kemi atë që ndodhi ndeshjen e kaluar me fotografin. Në këto situata nuk mund të vazhdojë kampionati. Ndërprerja nuk është e mirë por çfarë kuptimi ka të luhet kështu. Futbolli është për argëtim dhe duhen marrë masa ekstreme ku e para është rikthimi i policisë pasi klubet nuk e kanë forcën për të menaxhuar. Stjuartët nuk e kanë statusin dhe profesionalizmin për të menaxhuar prandaj këmbëngulim që policia të rikthehet në stadium.
Duhen marrë masa ekstreme për këta që po shkatërrojnë garën. Se çfarë bën Federata me KDS është procedurë tjetër por nuk e rregullojnë situatën. Kontrolli i tifozëve nga policia është i domosdoshëm”, tha Libohova.