Presidenti i Iranit, Masoud Pezeshkian, ka deklaruar se vendi ndodhet në një “luftë në shkallë të plotë”, duke theksuar se përballja nuk kufizohet vetëm në aspektin ushtarak, por përfshin edhe ekonominë dhe stabilitetin social.
Gjatë një mbledhjeje të Këshillit Suprem Gjyqësor, Pezeshkian u shpreh se Republika Islamike po përballet me një konflikt shumëdimensional.
“Realiteti është se sot Republika Islamike e Iranit është e angazhuar në një luftë në shkallë të plotë”, deklaroi ai, sipas agjencisë shtetërore IRNA.
Sipas presidentit iranian, kundërshtarët kanë kuptuar se nuk mund ta detyrojnë popullin iranian të dorëzohet vetëm përmes sulmeve ushtarake, ndaj po ushtrojnë presion edhe mbi ekonominë e vendit.
“Është e papranueshme për ne të jetojmë në një shoqëri ku njerëzit përballen me probleme të jetesës, papunësi, varfëri dhe vështirësi”, tha Pezeshkian, duke paralajmëruar se përkeqësimi i situatës ekonomike mund të ndikojë edhe në stabilitetin social dhe mbështetjen e qytetarëve ndaj sistemit.
Sipas të dhënave zyrtare, ekonomia iraniane vijon të përballet me vështirësi të mëdha. Papunësia është rritur, monedha vendase ka rënë në nivele rekord, ndërsa inflacioni vjetor në muajin qershor është raportuar në 88%.
Pezeshkian ka bërë edhe më herët thirrje për ruajtjen e unitetit kombëtar, duke e cilësuar kohezionin social si një nga prioritetet kryesore të Iranit në kushtet e krizës aktuale.