Pas samitit në Alaskë që nuk solli armëpushim, Presidenti amerikan Donald Trump priti në Shtëpinë e Bardhë presidentin ukrainas Volodymyr Zelensky, ndërsa më pas do të zhvillohet takimi me liderët europianë.
Zelensky, i cili pak pasi hyri në Zyrën Ovale i dorëzoi Trump-it një letër nga bashkëshortja e tij Olena Zelenska mbi dramën e fëmijëve ukrainas, deklaroi se është i gatshëm për një takim trepalësh, duke kujtuar urgjencën për t’i dhënë fund luftës sa më shpejt. Ai theksoi gjithashtu se është i hapur për zgjedhje në Ukrainë, por vetëm në kushte sigurie.
Presidenti amerikan sqaroi se SHBA do të përfshihet në garancitë e sigurisë, duke përsëritur se një armëpushim nuk është i domosdoshëm: “Mund të punojmë për një marrëveshje paqeje edhe ndërsa luftimet vazhdojnë.”