Nga: Agron Malaj, kreu i Bashkisë së Matit
Qyteti Burrel ndodhet midis dy akseve kryesore të vendit: Rrugës së Kombit(36 km) dhe Rrugës së Arbrit(22 km). Burreli si qytetet dhe qendër e Bashkisë Mat shtrihet mbi një pllajë mbi 300m lartësi në luginën e mesme të lumit Mat gati në qendër të krahinës Mat.
Zona ku shtrihet sot qyteti ka dhënë dëshmi të rëndësishme mbi zhvillimin e një kulture që nis nga epoka e bronzit ( 2100 p.e.s dhe me vazhdimësi deri në kohën e vonë antike shek VI e.s. dhe vijimësi edhe gjatë mesjetës e deri në ditët e sotme. Burimet historike japin të dhëna mbi ekzistencën e fshatit Bujril ose Burril, që përfshinte jo vetëm qytetin e sotëm Burrelin por edhe rrethina të tij.
Në vitin 1922 Burreli u caktua si Bashki dhe qendër e Nënprefekturës Mat dhe fizionomia e tij si qytet ndryshon gjatë periudhës së Monarkisë Shqiptare. Qyteti Burrel, nga periudha e monarkisë trashëgon edhe parkun ose lulishten e qytetit që mban emrin e Mbretëreshës Geraldina. Me iniciativë të kësaj të fundit, në vitet 30 të shekullit XX, u mbollën në këtë park disa nga bimët dhe drurët më të rrallë të kohës të marra që u sollën nga Australia, Azia etj.
Në nëntokën e këtij parku ndodhen edhe disa tunele që lidhin segmente të tuneleve të tjera që shtrihen në të gjithë qytetin që janë të ndërtuara gjatë periudhës socializmit. Burreli, i quajtur ndryshe edhe “qyteti i mollëve”, në vitet 60-të të shekullit XX, pati edhe periudhën e ndryshimeve me nisjen e punës për ndërtimin e institucioneve shtetërore, godinave, pallateve nga katër deri në 6 katëshe, parafabrikate e kullat në qendër të qytetit, dyqane, shkolla, kopshte e çerdhe, kinema, pallati i kulturës dhe sporteve, stadium etj.
Godina e Muzeut Historik i Rrethit Mat i cili ruan, administron, ekspozon disa nga vlerat historike, arkeologjike, etno-kulturore të trevës Mat, është një objekt kulturore i ndërtuar në vitin 1985 me një infrastrukturë moderne dhe bashkëkohore me pamje tërheqëse të fasadës së jashtme, stil arkitekturor që ka të kombinuar mjaft bukur elementet e kullës prej guri karakteristike matjane me ato të objekteve të kultit fetar katolik. Popullsia e Bashkisë #Mat në masën 39% është e vendosur vendosur në qytet dhe 61% e popullsisë e vendosur në fshatra! Burreli festoi këtë vit 100-vjetorin e shpalljes Bashki.