Prezantohet platforma online e Këshillit Konsultativ për konsultimin e akteve

Mbledhja e Këshillit Konsultativ Qeverisje Qendrore-Vetëqeverisje Vendore mblodhi përfaqësues të bashkive, shoqatave vendore dhe institucioneve qendrore për të diskutuar paketën me 11 projekt – akte të rëndësishme, si edhe për të ndarë zhvillimet më të reja në lidhje me arritje dhe projekte që ndikojnë pushtetin vendor.
Bashkëkryetarja e Këshillit Konsultativ, Romina Kuko, dha lajmin e kalimit në qeveri të marrëveshjes midis Programit të Zhvillimit të Kombeve të Bashkuara dhe Qeverisë Shqiptare për projektin STAR 3. Gjithashtu, Znj. Kuko ndau me të pranishmit një nga arritjet e projektit të Asistencës Teknike të mbështetur nga Delegacioni i BE-së në Shqipëri, më konkretisht platformën e Këshillit, e cila ofron mundësinë e konsultimitonlinetëprojekt-akteve në kohë reale dhe transparente për të gjithë përfaqësuesit e Këshillit.
Ngritjen e platformës së konsultimit të akteve e vlerësoi edhe Shefi i Bashkëpunimit në Delegacionin e BE-së në Shqipëri, Z. Hubert Perr, i cili ishte i pranishëm në mbledhje. Në fjalën e tij, Z. Perr theksoi se Këshilli Konsultativ luan një rol kyç në përparimin e mëtejshëm të agjendës së decentralizimit në Shqipëri. ‘Reforma administrative territoriale duhet të konsolidohet më tej si pjesë e agjendës më të gjerë të decentralizimit. Kjo është veçanërisht e nevojshme për të garantuar autonominë fiskale vendore dhe për të fuqizuar bashkitë që të ofrojnë shërbime cilësore publike me standarde për qytetarët” – u shpreh Z. Perr, duke shtuar se: “Integrimi në BE mund të jetë i suksesshëm vetëm nëse përfshihen bashkitë meqenëse më shumë se70 për qind e legjislacionit të BE-së duhet të zbatohet në nivel vendor. Decentralizimi është mënyra më efikase për t’i shërbyer qytetarëve të Shqipërisë; ndaj BE do të vazhdojë mbështetjen e Shqipërisë në këtë proces”.