Të dielën u mbajtën Primaret e PD-së së Sali Berishës, por në fund nuk dihet sesa simpatizantë kanë marrë pjesë. Mbyllja e procesit të votimit për kandidatët për kryetar Bashkie prodhoi vetëm shifrën e pjesëmarrjes, 55 mijë e 281 zgjedhës, por askush nuk kishte një përgjigje sa prej tyre ishin me teser partie dhe sa simpatizant. “Nuk i kemi evidentuar sa simpatizantë kemi. Dikur kemi pasur lista simpatizantësh duhet të fillojmë ti bëjmë”,-u shpreh Berisha.
Procesi u shoqërua me akuza dhe tërheqje nga gara të disa kandidatëve. Ne Kamëz fitoi kryetari i degës Arjan Hoxha edhe pse kandidati Shemsi Premci kërkoi anulimin e garës pasi denoncoi se lista e demokratëve ishte mbushur me socialistë.
Rezultati që zhgënjeu demokratët, duket se gëzoi Ilir Meten i cili sipas paktit mori 4 bashkitë që kërkoi: Kuçovën, Prrenjasin, Memaliajn dhe Skraparin. Të paktën dy deputetë pritet të lënë mandatin, për shkak se rezultuan fitues në primare, Luçiano Boçi në Elbasan dhe Zef Hila në Vaun e Dejës.
Në 6 Bashki pritet që zgjedhjet të përsëriten pasi dolën në balotazh. Interes të veçantë kishte hapja e kutive të Tiranës, ku pritej të dilte rivali zyrtar i Erion Veliajt, por nuk ndodhi kështu pasi Tirana shkoi në balotazh. Belind Këlliçi dhe Ilir Alimehmeti do të votohen sërish.