Presidenca belge e Këshillit Evropian është besimplotë në arritjen e një kompromisi dhe se Unioni do të mund të vijojë të mbështesë financiarisht Ukrainën. Kjo u tha nga ministrja e Jashtme Hadja Lahbib, e cila foli për mediat gjatë një eventi në Bruksel. Në dhjetor, Hungaria bllokoi propozimin e BE-së për të lëvruar 50 miliardë euro për Ukrainën në 4 vjet.
“Ne nuk do të marrim presidencën evropiane të 27 vendeve dhe të themi se nuk do të kemi sukses. Ne do t’ia arrijmë. Belgjika njihet për krijimin e urave, për dëgjimin e zërave të ndryshëm dhe për arritjen e marrëveshjeve. Me këtë logjikë ne po marrim presidencën evropiane”-tha Hadja Lahbib, ministre e Jashtme e Belgjikës.
Aktualisht bisedimet janë në vazhdim për të zhbllokuar situatën dhe burime konfidenciale thanë për Euronews se Hungaria insiston që mbështetja të ndahet në 4 pjesë, gjë që do t’i lejonte Budapestit të ushtronte veton për çdo raund të mbështetjes. Burime diplomatike thanë se Hungaria e lidh çështjen e zgjatjes së afateve me përdorimin e fondit të rikuperimit, të cilin rrezikon të Humbasë.
Kur bëhet fjalë për çështjet e jashtme, presidenca belge ka edhe një prioritet tjetër, të ndalë që konflikti në Gaza të përhapet në të gjithë rajonin.
“Kjo është ajo çka ne duam të shmangim, përshkallëzimin e konfliktit në rang rajonal. Zërat e popullit izraelit dhe zërat e popullit palestinez shkojnë në këtë drejtim. Ndaj natyrisht, ne e kemi prioritet atë që po ndodh në Lindjen e Mesme. Belgjika e kishte kthyer rifillimin e negociatave të paqes në Lindjen e Mesme në prioritet shumë përpara 7 tetorit”- shtoi Lahbib.
Presidenca belge e BE-së është e fundit përpara zgjedhjeve euro-parlamentare dhe synimi i saj është të mbyllë sa më shumë dosje legjislative.