Brenda pak javëve pritet të përfundojë procesi i rindërtimit në qytetin e Durrësit dhe të gjitha familjet që në 26 nëntorin e vitit 2019 humbën shtëpitë e tyre do të kenë tashmë një banesë të re.
Në emisionin “Vendi Im”, kryetarja e bashkisë Emirjana Sako bën bilancin e një operacioni që mund të krahasohet me ndërtimin e një qyteti të ri.
“Mos harrojmë se ne në Durrës kemi ndërtuar një qytet brenda qytetit dhe normalisht ky proces ëshrë dinamik dhe do të vijojë deri në dorëzimin e çelësave në lagjen e re të rindërtimit. Lagjia e re në Spitallë e cila është në punimet e fundit, kemi hedhur dhe shortet për apartamentet, dhe presim që me përfundimin e punimeve të vogla që kanë mbetur, rifiniturave, të bëjmë të mundur hyrjen e banorëve në banesat e reja të cilat shpresojmë dhe kemi objektiv që t’i mbarojmë në periudhën dhjetor-janar.
Mbi 300 familje kanë marrë grantet për te ndërtuar banesat e tyre dhe janë në procese likuidimi, pra kanë marrë 60% të grantit dhe janë në fazën e 40% të grantit.
Nga ana tjetër janë rreth 500 objekte të cilat janë banesa individuale të ndërtuara nëpër fshatra, ku sot njerëzit jëtojnë në banesat e reja. Wshtë ndërtuar lagjia e re e Manzës dhe atje janë futur të gjithë njerëzit në banesat e tyre,” sqaroj kryetarja e bashkisë së Durrësit.
Në Durrës 38 kopshte, çerdhe dhe shkolla të dëmtuara nga tërmeti janë ndërtuar nga e para.
“Programin e rindëtimit, siç u kemi thënë edhe qytetarëve, në 2024 kemi si objektiv për përfundimin e tij. Dhe me dorëzimin e çelësave në lagjen e re është mbyllur një kapitull i rëndësishëm i këtij programi,” deklaron kryebashkiakja Sako.
Tërmeti tragjik i 26 nëntorit të vitit 2019 ishte një prej ngjarjeve që trondit thellë Shqipërinë e veçanërisht qytetin e Durrësit, i cili ishte një prej zonave ku pasojat e këtij tërmeti u ndjenë më shumë.