Statusi i profesioneve të vështira të punës ishte në fokus të takimit sektorial të punës mes disa institucioneve përgjegjëse.

Në këtë takim ishin të pranishëm ministrja e Shtetit për Marrëdhëniet me Parlamentin, Elisa Spiropali, ministrja e Infrastrukturës dhe Energjisë, Belinda Balluku, ministrja e Ekonomisë dhe Financave, Anila Denaj, kryetari i grupit parlamentar të PS-së, Taulant Balla si dhe deputetë të PS-së.

Në takim u diskutua në lidhje me projektligjin “Për trajtimin financiar suplementar të punonjësve që kanë punuar në miniera në nëntokë, të punonjësve të industrisë së naftës dhe të gazit dhe të punonjësve që kanë punuar në metalurgji”.

“Minatorët, naftëtarët, metalurgët dhe të gjithë punëtorët që i janë përkushtuar këtyre profesioneve të vështira kanë gjithë vëmendjen tonë për t’i krijuar atyre lehtësira të nevojshme dhe të merituara, duke nisur nga trajtimi financiar suplementar, deri te dhënia e pensionit të parakohshëm deri në 10 vjet, para moshës normale të daljes në pension”, tha Spiropali.