Ish-kryeministri Sali Berisha ka zhvilluar sërish një takim me aktivistë të shoqërisë civile.
Lideri historik i të djathtës vuri thekin te protesta që pritet të mbahet më 7 korrik. Sipas tij, kjo qeveri nuk i jep zgjidhje problemeve të qytetarëve shqiptarë, por po i ngushton atyre lakun në fyt.
“Prania juaj dëshmon vendosmërinë e përbashkët për t’u angazhuar në një lëvizje e cila inaugurohet me protestën e 7 korrikut dhe finalizohet me shpëtimin e Shqipërisë nga një regjim, nga një qeveri e cila në mënyrë absolute siç e shikoni në çdo vendim në çdo akt dëshmon një mosndjeshmëri të plotë ndaj interesave të qytetarëve shqiptarë. Një qeveri e cila sikur nuk është një qeveri që përpiqet të zgjidhë dhe tu japë përgjigje problemeve, por një qeveri që me vendimet e saj ngushton çdo ditë e më shumë lakun në qafën e qytetarëve. Një qeveri e cila në rrafshin atdhetar vendos për ti thënë Jo Ose Po ftesës për në Bruksel duke mos përfillur asnjë institucion shqiptar, por na informon se u lidha me Vuçiç. Në fakt u lidh pasi mori vendimin ai. Një qeveri që shkon në Bruksel dhe flet 5 herë më shumë për Serbinë sesa për Shqipërinë, ndërsa për Kosove ndalohet të bëjë avokaten e saj. Shqipërinë e ka penguar Edi Rama dhe jo Bullgaria”, u shpreh Berisha.