Policia e Kukësit ka nisur procedim penal për 13 persona, që ishin në protestën e organizuar një ditë më parë, gjatë takimit të kryeministrit Edi Rama.
Sipas një njoftimi të policisë, ata akuzohen për kundërshtim të punonjësit të policisë, organizim dhe pjesëmarrje në manifestime të paligjshme dhe pengim të qarkullimit të mjete të transportit.
Një ditë më parë kryeministri Edi Rama u prit me protesta nga opozita, e cila tha se shefi i qeverisë po shkonte me helikopter në takim.
NJOFTIMI I POLICISE
Në lidhje me protestën e paligjshme, të zhvilluar më datë 05.04.2019, të organizuar nga subjekti politik PD Kukës e Has, në vendin e quajtur “Ura e Drinit të Zi” janë proceduar në gjendje të lirë 13 shtetas, të moshës nga 28 – 60 vjeç, nga Kukësi e Hasi.
Procedimi ndaj tyre filloi pasi, kanë penguar qarkullimin e mjeteve të transportit, si dhe kanë kundërshtuar punonjësit e Policisë së Shtetit.
Materialet për veprime të mëtejshme do t’i kalojnë Prokurorisë Pranë Gjykatës së Shkallës së Parë Kukës, për veprat penale “Kundërshtimi i punonjësit të rendit publik”, “Organizimi dhe pjesëmarrja në grumbullime e manifestime të paligjshme” dhe “Pengimi i qarkullimit të mjeteve të transportit”.