SPANJË- Një numër i madh njerëzish kanë protestuar në Valencia kundër trajtimit të autoriteteve ndaj përmbytjeve vdekjeprurëse të fundit, duke kërkuar dorëheqjen e kreut rajonal Carlos Mazón.
Mediat spanjolle, duke përfshirë agjencinë e lajmeve Efe, cituan një organ qeveritar të thoshte se 130,000 njerëz dolën në rrugë të shtunën me protestuesit duke brohoritur “ne jemi të lyer me baltë, ju jeni të njollosur me gjak”.
Më shumë se 200 njerëz vdiqën në përmbytjet, të cilat u shkaktuan nga shiu i rrëmbyeshëm që goditi Valencia dhe provincat fqinje në tetor. Ndërsam, rreth 80 persona janë ende të zhdukur.
Protestuesit kanë akuzuar autoritetet lokale për lëshimin e paralajmërimeve për përmbytjet shumë vonë. Protestuesit e zemëruar u përleshën me policinë në fund të demonstratave.
Fotot tregojnë Bashkinë e Valencias të lyer me baltë, ndërsa agjencia e lajmeve Reuters raporton se protestuesit hedhin karrige dhe objekte të tjera. Kryetarja e bashkisë së qytetit, María José Catalá, postoi foto të xhamave të thyer dhe një video që tregonte ndezjen e zjarrit në mediat sociale, duke shtuar: “Vandalizmi nuk është zgjidhja”.
Këshilli Bashkiak i Valencias dënoi “vandalizmin”, duke thënë se qyteti ishte prekur gjithashtu nga përmbytjet. Anna Oliver, një nga organizatorët e protestës, i tha agjencisë së lajmeve Reuters: “Ne duam të tregojmë indinjatën dhe zemërimin tonë për menaxhimin e dobët të kësaj fatkeqësie që ka prekur kaq shumë njerëz”.
Javën e kaluar mbreti dhe mbretëresha e Spanjës u goditën me baltë dhe objekte të tjera nga protestuesit e zemëruar gjatë një vizite në qytetin e Paiporta, një nga më të prekurit. Objekte u hodhën edhe ndaj kryeministrit Pedro Sánchez, i cili u evakuua shpejt.
Mijëra njerëz kanë humbur shtëpitë e tyre dhe rrugët në shumë zona janë ende të mbuluara me baltë dhe mbeturina. Në Spanjë, qeveritë rajonale janë përgjegjëse për trajtimin e reagimit ndaj fatkeqësive dhe mund të kërkojnë burime shtesë nga qeveria qendrore në Madrid.
Agjencia spanjolle e motit lëshoi paralajmërime për stuhi për rajonin nga 25 tetori, por autoritetet e Valencias nuk lëshuan alarme për telefonat celularë lokalë deri disa orë pas fillimit të përmbytjeve. Këshilltarja lokale e ngarkuar me emergjencat ka pranuar që atëherë se nuk e dinte se ekzistonte një sistem për dërgimin e sinjalizimeve telefonike.
Përmbytjet në Valencia u shkaktuan nga një fenomen Dana – kur ajri i ngrohtë dhe i lagësht takohet me ajrin e ftohtë, duke krijuar një sistem moti të paqëndrueshëm. Shkencëtarët thonë se ngrohja e klimës i përkeqësoi përmbytjet.