Prokuroria ka pushuar akuzat kreun e Qendrës së Lëvizjes Vetëvendosje në Tiranë, Boiken Abazi, dhe 5 të ndaluar të tjerë, të cilët u arrestuan për protestën kundër prishjes së teatrit kombëtar.
Prokurori i thotë gjykatës se nuk provohen asnjë nga akuzat si manifestim dhe protestë e paligjshme, bllokim i rrugës dhe kundërshtim të forcave policore. Të vetmit që do gjykohen janë dy vëllezërit Mërtiri.
Për RTV Ora, Abazi tha se ka pasur një tentativë të qartë për ti portretizuar si një grup radikal të VV por rezultoi se vetëm ai ishte anëtar i saj.
Megjithatë, Abazi tha se do të vazhdojë të paraqitet në Prokurori edhe të martën e ardhshme pasi nga kjo e fundit ende nuk ka një njoftim zyrtar për pushimin e çështjes.
Abazi: Qartazi këtu kemi një sistem drejtësie të dështuar në të gjitha drejtimet, e dëshmon situata me tërmetin ku nuk është ndëshkuar asnjë, e dëshmon dhe fakti se nuk është çuar para drejtësisë asnjë prej atyre që morën vendimin antiligjor dhe antikushtues për shembjen e teatrit, ka pasur një tentativë të qartë politike për ta portretizuar një grup njerëzish prej 8 vetash si një grup radikal i VV që prishi rendin publik atë ditë kur shembte në mënyrë antikushtetuese pushteti teatrin. Por zbuluam se anjë përveç meje nuk ishte aktivist i VV. Unë do të doja të ishin aktivistë të VV, por si duket pas 6 muajve pasi mbaruan afatet e hetimit nuk kishin çfarë të bënin. Por ne e dimë vetëm nga mediat dhe nuk ka njoftim zyrtar nga prokuroria. Unë do të vazhdoj të paraqitem edhe ditën e martë në prokurori siç isha këtë të martë.