Protesta e studentëve ka vijuar edhe këtë të mërkurë, ndërsa në disa universitete dhe shkolla të mesme është raportuar bojkot i procesit mësimor.
Në Tiranë, një pjesë e studentëve kanë bojkotuar auditorët në Fakultetin e Drejtësisë dhe në Universitetin Politeknik, ndërsa më pas janë nisur në marshim drejt Ministrisë së Arsimit.
Studentët e Mjekësisë janë zhvendosur pranë Fakultetit të Shkencave të Natyrës, ku u kanë bërë thirrje studentëve të tjerë që të ndërpresin mësimin dhe t’i bashkohen protestës.
Bojkotit i janë bashkuar edhe nxënës të gjimnazit “Partizani” në kryeqytet. Gjatë protestës, disa prej tyre kanë nxjerrë kosha mbeturinash në mes të rrugës dhe u kanë vënë flakën, duke shkaktuar përkohësisht bllokimin e qarkullimit.
Protesta dhe bojkoti nuk janë kufizuar vetëm në Tiranë. Në Elbasan, studentët e Fakultetit Ekonomik të Universitetit “Aleksandër Xhuvani” kanë bojkotuar gjithashtu procesin mësimor në shenjë proteste.
Ndërkohë, në kryeqytet studentët po vijojnë marshimin drejt Ministrisë së Arsimit, ku pritet të përqendrohet protesta e ditës së sotme.