Pas lajmeve që leja për protestën e 16 shkurtit është refuzuar 4 herë nga Policia e Shtetit ka reaguar edhe PD. Përmes një deklarate zyrtare, Partia Demokratike thekson se nuk pret leje nga Policia e Shtetit për protesta duke e argumentuar si një e drejtë Kushtetuese.
Tirananews.al ka siguruar kërkesën që PD i ka dërguar Policisë së Shtetit ku i kërkon leje për protestën.
“Ju rinjoftojmë se tubimi i datës 16 Shkurt 2019, do të zhvillohet në sheshin dhe vendkalimin publik: “Bulevardi Dëshmorët e Kombit, Sheshi përpara Kryeministrisë, Lulishtja tek Piramida dhe Rruga Ismail Qemali” (sipas hartës së dërguar edhe më parë). Caktimi i vendit të tubimit, është e drejtë kushtetuese e organizatorit dhe drejtuesit të tubimit. Kjo është arsyeja përse ligji parashikon njoftimin dhe jo kërkesën për leje në rastin e zhvillimit të një tubimi. Kufizimi i njoftuar me shkresën nr. 1507/14 Prot., datë 12.02.2019, ku ju në kundërshtim me ligjin përpiqeni të na caktoni vendin e tubimit, del jashtë kompetencave dhe përgjegjësive ligjore të Policisë së Shtetit. Ju bëjmë me dije se për këtë kufizim nuk keni referuar bazën ligjore të tij dhe se arsyet e dhëna më parë dalin jashtë rasteve të lejuara nga neni 8 i ligjit nr. 8773/2001. Për pasojë, kufizimi i njoftuar nuk është në përputhje me përgjegjësitë që ka Policia e Shtetit sipas shkronjës “a”, pika 1 e nenit 6 të nr. 8773/2001 dhe për këtë shkak përbën kufizim të paligjshëm dhe të papranueshëm për ne. Ky kufizim përbën pengim të paligjshëm dhe jo proporcional të lirisë së tubimit dhe si i tillë nuk mund të merret në konsideratë nga ana jone”, thuhet në kërkesën e PD drejtuar Policisë të siguruar nga Tirananews.al.
PD thekson se rikonfirmon zhvillimin e tubimit në zonën e njoftuar dhe paralajmëron se “se është nën përgjegjësinë tuaj personale dhe institucionale, çdo pengim i lirisë së ushtrimit të tubimit në zonën e njoftuar në datën 16 Shkurt 2019 dhe pasojave që mund të shkaktojë ky fakt gjatë ditës së tubimit. Për të gjitha sa më Iart, merrni masat e nevojshme organizative për të garantuar zhvillimin e tubimit në sheshin dhe vendkalimin publik”, theksohet në kërkesë. / tirananews.al
