Disa mijëra persona mbushën rrugët në Barcelonë për të kërkuar një ulje me 50 për qind të qirave dhe për të paralajmëruar me grevë nëse situata e strehimit nuk përmirësohet.
Autoritetet raportuan se në protestë morën pjesë 22 mijë persona, por organizatorët thanë se ata ishin 126 mijë.
Manifestimi, i organizuar nga një sindikatë, kishte parullën “Mjaft me kaq” në dialektin katalanas. Kërkesat e qytetarëve përfshinin promovimin e kontratave me afat të pacaktuar me qëllim dhënien fund të shantazheve dhe pasigurive, rikuperimin e shtëpive për të banuar dhe ndalimin e blerjeve spekulative.
Një raport i Bankës së Spanjës tregon se rreth 40 për qind e qiramarrësve spanjollë shpenzojnë 40 për qind të të ardhurave për pagesën dhe detyrime të tjera, shumë më lartë krahasuar me mesataren e BE-së prej 23 për qind.
Tubimi në Barcelonë vjen vetëm një muaj pasi mijëra qytetarë marshuan në rrugët e Madridit për të njëjtin motiv.