Kreu i SPAK, Klodian Braho, refuzoi të komentojë situatën ligjore të ish-presidentit Ilir Meta dhe ish-kryeministrit Sali Berisha, duke theksuar se nuk jep deklarata për çështje konkrete që janë në proces hetimi ose gjykimi.
Gjatë raportimit në Komisionin për Nismat Qytetare, Bashkëpunimin dhe Mbikëqyrjen Institucionale, Braho iu përgjigj pyetjes së deputetes Elda Hoti se përse Meta vijon të mbahet në burg, ndërsa Berisha është nën masën e detyrimit për t’u paraqitur dy herë në muaj në Prokurori.
“Të gjitha pyetjet tuaja lidhen me çështje konkrete dhe unë nuk kam koment. Kush është i proceduar ka të drejtë të kundërshtojë në gjykatë dhe ta çojë çështjen edhe në gjykata më të larta”, deklaroi Braho.
I pyetur edhe për pretendimet mbi afera që lidhen me kryeministrin Edi Rama, kreu i SPAK ritheksoi se çdo akuzë duhet të mbështetet me prova konkrete.
“Sa i përket ndërhyrjeve të kryeministrit, nëse keni prova, paraqitini në organin kompetent. Ajo që them unë është se të gjithë janë të barabartë para ligjit”, u shpreh ai.
Braho komentoi gjithashtu edhe çështjen e ndërtimeve në Kurbin, duke konfirmuar se procedimi vijon të jetë në fazën e hetimeve.
“Në lidhje me çështjen e ndërtimeve në Kurbin, është një çështje në hetim”, tha kreu i SPAK.