Përhapja e koronavirusit mes bluzave të bardha ka sjellë dhe akuza ndaj tyre lidhur me përgatitjen për tu përballur me virusin dhe marrjen e masave.
Për këtë ka reaguar edhe Shoqata e Infermierëve e cila thotë se mungojnë maskat profesionale.
Por sipas Shoqatës së Infermierëve, infektimi i personelit infermieror ka ardhur për disa arsye dhe përgjegjësinë duhet të mbajnë jo profesionistët e shëndetit, por qeveria. Infermierët, vë në dukje në reagimin publik shoqata, u infektuan sepse nuk ishin siguruar materialet e nevojshme për mbrojtjen e personelit shëndetësor, nuk u trajnuan se si duhet të shërbenin, por edhe për shkak të mungesës së kushteve higjieno-sanitare në spital.
“Shoqata e Infermierëve të Shqipërisë shpreh keqardhje ndaj deklaratave të bëra në drejtim të personelit shëndetësor e sidomos ndaj infermierëve, duke i fajësuar për rastet e shtuara nga bluzat e bardha të prekur me COVID-19. Në dijeninë tonë, që në hapat e para kur u identifikuan të prekurit e parë me COVID, ishin pikërisht infermierët, të cilët, si në çdo rast janë kontakti i parë me pacientin, që jo vetëm shërbyen me sakrificë, por u infektuan dhe a e dini pse?
Sepse nuk ishin marrë masa për këtë pandemi që kur u ngrit alarmi për përhapjen e këtij virusi; sepse nuk ishin siguruar materialet e nevojshme për mbrojtjen e personelit shëndetësor; sepse nuk ishte trajnuar se si duhet të shërbenin e njëkohësisht si të mbroheshin ndërsa shërbenin; sepse nuk ka kapacitet mjaftueshëm për këta të sëmurë dhe nuk ka higjienë spitalore të përshtatshme as për këta të sëmurë e as për personelin shëndetësor”, thuhet në reagimin e shoqatës.