Qeveria ka zgjedhur një sistem progresiv taksimi që stimulon, mbështet dhe përjashton nga taksat bizneset me atë ardhura të ulëta, me qëllim që ato të fuqizohen dhe takson me një normë 15% tatimpaguesit e mëdhenj (kompanitë e mëdha).
Niko Lera, Drejtor i Politikave Fiskale në Ministrinë e Financave, në një intervistë për Agjencinë Telegrafike Shqiptare (ATSH), deklaroi se, “ky është një sistem progresiv që lehtëson nga barra fiskale bizneset e vogla, vendos një tarifë të reduktuar për ato biznese të nivelit dhe takson me tarifë 15% një grup të vogël prej 9% të sipërmarrjeve të mëdha”.
“Nëse e marrim në mesatare, është ngarkesa fiskale më e ulët në rajon, sepse tejkalon edhe taksën e sheshtë 10% apo 9% që aplikojnë vende të tjera të rajonit”, – theksoi Lera, ekspert i politikave fiskale. E thënë ndryshe 91% e komunitetit të sipërmarrjeve në Shqipëri, qofshin të vogla të mesme paguajnë tatim 0 deri 5%, dhe vetëm 9-10% paguajnë tatim 15%.