Botërori i futbollit që këtë dimër mbahet në Katar, nisi më 20 nëntor, me ndeshjen hapëse të zhvilluar mes ekipit pritës dhe Ekuadorit.
Janë luajtur edhe 55 ndeshje të tjera (në total, 48 në fazën e grupeve dhe tetë në 1/8). Kompeticioni tashmë është në fazën çerekfinale dhe këtë të mërkurë nuk do të luhet asnjë ndeshje, pasi turneu do të shijojë ditën e parë të pushimit.
Kupa e Botës në Katar do të ndërpritet për dy ditë, në mënyrë që skuadrat e kualifikuara të përgatisin me më shumë kohë ndeshjet përkatëse. Botërori rifillon të premten e ardhshme, ditë në të cilën do të luhen dy ndeshjet e para çerekfinale: Kroaci-Brazil dhe Holandë-Argjentinë.