Një ngjarje tragjike ka ndodhur një ditë më parë, 12 dhjetor, gjatë kryerjes së punimeve për rikonstruksionin e një shkolle në fshatin Polis të Elbasanit, ku një punonjës ka rënë nga lartësia, duke humbur jetën.
Pas ngjarjes, policia ka arrestuar në flagrancë shtetasin M. S., 33 vjeç, administrator dhe drejtues teknik i punimeve.
“Specialistët për Hetimin e Krimeve të Komisariatit të Policisë Elbasan arrestuan në flagrancë shtetasin M. S., 33 vjeç, administrator dhe drejtues teknik i punimeve, për veprën penale ‘Shkelja e rregullave të mbrojtjes në punë’. Ditën e djeshme, gjatë kryerjes së punimeve për rikonstruksionin e një shkolle në fshatin Polis, dyshohet se ka rënë nga lartësia punonjësi, shtetasi Sh. M., 57 vjeç, i cili, si pasojë, ka humbur jetën.”, thuhet në njoftimin për mediat.
Policia po vijon hetimet për dokumentimin e plotë të rrethanave të ngjarjes, ndërsa materiali i procedimit penal iu kalua Prokurorisë për veprime të mëtejshme.
Ngjarja rikujton rëndësinë e respektimit rigoroz të masave të sigurisë në punë, veçanërisht në aktivitetet që kryhen në lartësi.