Ministri i Jashtëm rus, Sergei Lavrov, ka mohuar deklarimet se presidenti Vladimir Putin është i sëmurë, dhe se vuan nga një lloj tumori në gjak. Por i menjëhershëm ka qënë reagimi i Kryediplomatit rus Sergei Lavrov, i cili tha se: “Putin nuk ka shenja që tregojnë për ndonjë sëmundje”.
Sipas Lavrov, raportimet që Putin po vuan nga kanceri janë thashetheme! Duke iu përgjigjur një pyetje nga transmetuesi francez TF1, kryediplomati rus tha: “Unë nuk mendoj se njerëzit e arsyeshëm mund të shohin tek Putin shenja të një lloj sëmundjeje”.
Lavrov tha se Putin, i cili do të mbushë 70 vjeç në tetor, shfaqet në publik “çdo ditë”. “Ju mund ta shikoni atë në ekrane, të lexoni dhe dëgjoni fjalimet e tij,” tha Lavrov.
Raportimet se Putin po vuan nga kanceri, Lavrov i quajti thashetheme. “E lë në ndërgjegjen e atyre që përhapin thashetheme të tilla”, u shpreh ai.
Putin, i cili ka qenë në pushtet në Rusi për më shumë se dy dekada, dërgoi trupa në Ukrainë më 24 shkurt, duke shkaktuar valë tronditëse në mbarë botën. Ofensiva e Moskës ka vrarë mijëra njerëz, ka shkaktuar krizën më të madhe të refugjatëve në Evropë që nga Lufta e Dytë Botërore dhe ka çuar në sanksione të pashembullta perëndimore kundër Moskës.