Gjykata e Elbasanit ka dhënë masën e sigurisë ‘arrest me burg’ për 45-vjeçarin, Josif Kavaja, i cili tmerroi fshatin Zavalinë para disa ditësh, ku qëlloi me armë zjarri edhe ndaj policisë së Shtetit. Gjatë seancës që u zhvillua në Gjykatë, nën masa të rrepta sigurie dhe në zbatim të rregullave kundër Covid-19, Josif Kavaja është shprehur se nuk vuan nga probleme të shëndetit mendor, siç u deklarua në media.
Në seancë, ai ka shpjeguar dhe rrjedhojën e ngjarjes duke thënë gjithçka ka nisur si pasojë e provokimeve të bëra nga një tjetër banor i zonës me të cilin ka pasur vazhdimisht probleme. Kavaja ka mohuar se vuan nga probleme të shëndetit mendor, por gjykatësi ka vendosur që 45-vjeçari t’i nënshtrohet edhe një ekzaminimi psikik.
Ndërkohë, Prokurori i çështjes Xhelian Saferi ka ngritur edhe dy akuza të tjera ndaj Josif Kavajës atë te ‘Tentativë vrasjeje të efektivave RENEA’ dhe ‘Tentativë vrasje të efektivave të policisë së shtetit’.
Kavaja terrorizoi fshatin Zavalinë para disa ditësh dhe qëlloi me armë zjarri drejt banorëve dhe efektivëve të policisë. Pas mjekimit, ai u dërgua në polici për tu marrë në pyetje dhe eskpertët paraprakë dolën në përfundimin se Josif Kavaja vuan nga probleme të shëndetit mendor. Ndërkohë pas 12 orësh arrati, në fshatin Zavalinë të Elbasanit, Josif Kavaja është arrestuar mëngjesin e 26 dhjetorit.