Shqipëria ishte ndalesa e fundit e një turi dyjavor nëpër Europë e nënsekretarit amerikan për Rritjen Ekonomike, Energjinë dhe Mjedisin, Keith Krach, por në Tiranë ai u shpreh i lumtur që më të mirën la për në fund.
“Për dy javë i rashë këmbë e kryq Europës, por jam i lumtur që më të mirën lashë për në fund” tha ai.
Ai falenderoi qeverinë shqiptare për qasjen ndaj 5G dhe rreshtimin përkrah shumë vendeve të tjera të NATO-s në rrjetin e pastër.
“Kërcënimi i privatësisë së të dhënave intelektuale dhe sigurisë kombëtare. Ky kërcënim vjen nga ndërhyrja e aktorëve malinjë, Partia komuniste kineze. Mbështetja juaj e hapur në përkrahje të rrjeteve të sigurta të telekomunikacionit po jep një shembull të fortë. Është një model. Ashtu si zyrtarët e NATO dhe BE-së me të cilët kam folur e kuptojnë se aleanca transatlantike është aq e fortë sa hallka e saj më e dobët.
Rregullat e BE për 5G janë zhvilluar për këtë arsye. Rrjeti i pastër përfaqëson ekzekutimin e një strategjie shumë vjeçare të ndërtuar mbi një koalicion partnerësh të besuar njerëzish dhe kompanish. Deri tani mbi 20 vende të NATO-s janë pjesë e rrjetit të pastër.
Janë të gjithë të vendosur të refuzojnë të gjithë këto mjete që shërbejnë si mundësi për të survejuar vende të tjera. Shqipëria është një vend i rrugës së pastër. Shqipëria është bashkuar me valën e rrugës së pastër dhe ne jemi të kënaqur”.
Pikërisht ky qëndrim duket se do të hapë dhe rrugën për rritjen e bashkëpunimit ekonomik mes SHBA-BE dhe shtimin e investimeve amerikane në vendin tonë, duke nisur me ndërtimin e HEC-it të Skavicës.
Krach tha se rritja e investimeve amerikane në Shqipëri, do krijojë vende të reja pune, ndërsa e quajti Skavicën një projekt historik.
“Ky është një hap i rëndësishëm për shtrirjen e bashkëpunimit dhe investimeve amerikane. Është projekt i rëndësishëm, nuk mund të kishte zgjedhur partner më të mirë për ndërtimin. Skavica do ti sjellë Shqipërisë energji shtesë. Ky projekt historik do jetë pasuri kombëtare për popullin e Shqipërisë”.
Shqipëria dhe SHBA nënshkruan sot Memorandumin e Bashkëpunimit Ekonomik, një hap madhor në marrëdhëniet mes dy vendeve, që e bën Shqipërinë një adresë të besueshme për investimet amerikane.
Bashkëpunimi strategjik për rrjete digjitale të sigurta, zhvillimi i burimeve hidrike dhe përpunimi i gazit të lëngshëm janë në interesin e përbashkët të Shqipërisë dhe Shteteve të Bashkuara.