Një risi e madhe për komunitetin arbëresh në Itali: Rai do të transmetojë për herë të parë programe të plota radiofonike dhe televizive në gjuhën shqipe arbëreshe.
Vendimi erdhi pas marrëveshjes së nënshkruar mes Presidencës së Këshillit të Ministrave – Departamenti për Informimin dhe Botimet – dhe Rai-t, e cila i hap rrugë prodhimeve të reja kushtuar kulturës dhe identitetit arbëresh.
Kjo nismë lidhet me Ligjin nr. 482 të vitit 1999 për mbrojtjen e pakicave historike gjuhësore në Itali, si dhe me kontratën e shërbimit kombëtar, që garanton promovimin dhe ruajtjen e këtyre gjuhëve në rajonet ku ato janë ende të gjalla.
Programacioni në gjuhën arbëreshe do të nisë nga mesi i shtatorit dhe do të zgjasë për 13 muaj. Detajet e plota do të prezantohen të enjten, më 11 shtator, në orën 11:00, gjatë një konference për shtyp që do të mbahet në selinë e Rai-t në Kozencë.