Kryeministri Edi Rama deklaroi se qeveria do të vërë në dispozicion 15 milionë euro për barnat onkologjike, me synimin për të forcuar kapacitetet e sistemit shëndetësor.
Gjatë një bashkëbisedimi me pensionistët, Rama tha se përveç këtij fondi janë parashikuar edhe financime të tjera për sektorin e shëndetësisë, ndërsa theksoi se sfida kryesore mbetet rritja e cilësisë së shërbimeve.
“Kemi vendosur 15 milionë euro vetëm për barnat onkologjike, që do të fuqizojnë kapacitetet e sistemit. Ka edhe një sërë financimesh të tjera për shëndetësinë. Është domosdoshmëri rritja e cilësisë së shërbimit dhe këtë do ta bëjmë përmes partneriteteve, nuk do ta bëjmë vetë”, u shpreh kryeministri.
Në vijim të deklaratës së tij, Rama komentoi edhe debatin politik, duke u shprehur se vendi nuk ka nevojë për eksperimente të reja.
“Kemi një muaj që dëgjojmë çudira të mëdha. Nuk mendoj që Shqipëria dhe shqiptarët kanë uri për një tjetër eksperiment social dhe ideologjik. Ne duhet të jemi të vendosur të rrisim kapacitetet tona për të konkurruar me të tjerët”, deklaroi ai.