Kryeministri Edi Rama në një takim me përfaqësues të Internacionales Socialiste dhe partive simotra europiane, tha se qeveria po përdor inteligjencën artificiale. Kjo për të lehtësuar procesin e përafrimit të kuadrit ligjor shqiptar me atë të Bashkimit Europian. Sipas Ramës, kjo qasje shmang vonesat dhe ul nevojën për një numër të madh përkthyesish, duke përshpejtuar procesin e negociatave.
Një nga aspektet më të rëndësishme që Rama theksoi ishte barazia para ligjit dhe reforma në drejtësi. Ai e cilësoi si revolucionare faktin që për herë të parë në historinë e Shqipërisë njerëz të fuqishëm, të lidhur me politikën dhe shtetin, po japin llogari para drejtësisë. “Nuk është aspak e lehtë të shohësh njerëz që i njeh prej vitesh të dalin para drejtësisë, por kjo është pjesë e një procesi të domosdoshëm”, tha Rama, duke shtuar se këto procese kërkojnë kohë dhe durim.
Kryeministri theksoi se reforma në drejtësi kanë pastruar sistemin nga ndërhyrjet politike dhe se tashmë pushteti ekzekutiv nuk ka më ndikim mbi vendimet e drejtësisë. “Për herë të parë që nga shpallja e pavarësisë në 1912, kemi një sistem drejtësie që funksionon i pavarur. Kemi dorëzuar shpatën e ndëshkimit nga pushteti ekzekutiv te pushteti gjyqësor”, deklaroi ai.
Rama siguroi se qeveria shqiptare do të vazhdojë të punojë me përkushtim për të përmbushur detyrat e nevojshme për anëtarësimin në BE, duke shfrytëzuar edhe teknologjinë më të fundit për të përshpejtuar proceset burokratike dhe ligjore.