Kryeministri Edi Rama, në një takim me sipërmarrjen për të diskutuar mbi domosdoshmërinë e rritjes së mëtejshme të pagave, ndër të tjera tha se ka ardhur momenti që epoka e shfrytëzimit të punonjësve duhet të përfundojë.
“Sipërmarrja po e shikon se lufta për ruajtjen e burimeve njerëzore i ka hyrë në territorin e vet. Po e shikon se si po i ikin nga duart ato forca pa të cilat sipërmarrja vdes, njerëzit. Të gjithë po e shohin se si shtetet më të zhvilluara janë futur me kokë për të zhvatur nga të munden burimet njerëzore të kujt të munden.
Nëse një punonjës ose një i ri ka mundësinë dhe perspektivën që të duke u larguar ta gjejë punën diku tjetër, sipërmarrja nuk ka ku shkon. Sipërmarrja nuk largohet dot nga vendi. Tani, dilema është të rrojë apo të vdesë. Nëse shikojmë përmbajtjen e financave dhe të ekonomisë, nuk është dilemë e vështirë. Duhet të rrojë duke mbështetur punonjësit që edhe ata të rrojnë. Epoka e shfrytëzimit të punonjësve duhet të përfundojë”, tha Rama.