Flamur Noka ka sulmuar kryetaren e Kuvendit Lindita Nikollën, pasi përjashtoi kreun e PD-së, Sali Berisha nga seanca parlamentare e të enjtes së shkuar. Noka i është drejtuar Nikollës, duke e quajtur kukull barbie.
“Po bëhet gjithçka që opozitës ti ndërpritet zëri.Ky është monizëm. Ne kërkuam kryeministrin në sallë. Ne kërkuam që kjo të zhvillohet. Kanë vënë një kukull Barbie që të mos vazhdojë seanca. A mundet Rama dhe kukulla e tij t’i përjashtojnë të gjithë? Nuk munden.Këta vazhdojnë të bëjnë përpjekje të neveritshme. Unë ndjej keqardhje për kukullën barbi, e trajtojnë si ato matrioshkat”, u shpreh Noka TE “Kjo Javë”.
Noka ka folur gjithashtu edhe për çështjen McGonigal.
Sipas tij, Rama ka paguar para për të zhdukur opozitën, teksa tha se Shqipëria nuk do të ketë paqe deri sa të largohet Edi Rama.
“Ky skandal është i paprecedentë. Me para krimi korrupton një drejtues nëpërmjet ca sekserëve të sigurimit të shtetit, a mund të takosh më si përfaqësues i një shtetit figura të larta. Kush është ai shtetar i huaj, mik aleat apo partner i Shqipërisë që mund t’i shtrijë më dorën Edi Ramës. Si mund të kapesh me kthetra pas karriges sepse s’mund t’i përfaqësosh. Jo protestën e radhës, por Protestat. Do të konsultohemi me aleatët javën që vjen dhe më pas Shqipëria nuk ka paqe. Armiku i demokracisë nuk ka paqe. Kemi dëgjuar që oficer police mund të korruptoheshin , por nuk ndodh të poshtërosh vendin tënd duke tentuar të godasësh në zemër sigurinë e aleatit tonë SHBA. Rama është kapur me presh në duar.”