Kryeministri Edi Rama deklaroi nga Thethi se rritja e fondeve publike lidhet drejtpërdrejt me zhvillimin e ekonomisë dhe tërheqjen e investimeve.
Gjatë një takimi me banorët e zonës, Rama tha se shtetet konkurrojnë për të siguruar sa më shumë investime të huaja, pasi, sipas tij, ato ndikojnë në rritjen e ekonomisë dhe të mundësive financiare të qeverisë.
“Nga vijnë fondet? Fondet vijnë nga investimet. Rrit ekonominë, rrit mundësinë për të rritur fondet. Edhe shtetet e botës, demokratike apo jodemokratike, bëjnë garë se kush sjell më shumë investime të huaja”, deklaroi Rama.
Kryeministri kritikoi ashpër kundërshtarët e investimeve të huaja, duke përdorur ndaj tyre përcaktimet “sharlatanë”, “delirantë” dhe “ekstremistë”.
“Në Shqipëri dalin lloj-lloj sharlatanësh, delirantësh dhe ekstremistësh, disa të së majtës dhe disa të së djathtës, dhe thonë se nuk duam investime të huaja, nuk duam të huaj në Shqipëri dhe nuk duam ta shesim Shqipërinë”, tha ai.
Rama kundërshtoi pretendimin se lejimi i investitorëve të huaj nënkupton shitjen e vendit, duke sjellë si shembull investimet nga Katari në Francë.
“Kujt po ia shesim, kur, ku dhe si? Kush po e blen Shqipërinë? Ata që janë në investimin e shumëdiskutuar të Katarit dhe që sot kanë blerë një pjesë të Parisit, a e kanë marrë Francën me vete në Katar?”, u shpreh kryeministri.